Fo’i mucha ma lanta tende hende ta bisa ku papiamentu ta malu. Un dia ma disidí di bai puntra pe na dòkter, dòkter di nunka e no a mir’e. E or’ei ma pensa porta e la kue ko’i hende anto ma bai polis pa wak si ta nan a kue. Polis di ku mi no, kuenti kuementu si mihó bo puntra pastor. Pastor a laga sa: “mi no sa di dje, pero mi ta keda den orashon paso ta den mi misa mi ke pe bin”. Ami a sali bai pa sigui ku mi kaminda di krus.
Ma drenta outo start sende lus, sali hanchi, hañami atrobe para den lus. Ma puntr’e gai para ta bende pinda si e la mira papiamentu, E gai di “hòmbu no sa papia, ta ko’i pinda e kon’ai!” Lus a bira bèrdè ma sigui kore. Nèt riba un kabe’i seru ma topa ku un para. Ma para pa mi puntr’e para si e sa algu di papiamentu, e Para di: “mi no ta kòrda paso mi ta poko altu, pero segun mi e ta malu, su keintura ta poko altu”.
E para a pidi mi bah’e na punt’i hanchi. Yega punt’i hanchi dal den un snek, hamber a dal mi, ke men ma baha dal un pida galiña. Kab’i kome ata mi para para ta buska mi telefòn… E para a dal mi! Desapuntá, ma disidí keda ne snek dal dos beter. Un galiña chan chan para a kai sinta band’i mi. E la puntra mi, kon ta? Mi di kun’e “no bon manera bo”! E di “Hesus bo ta malu”.
Ma splik’e ku no ta ami ta malu, ta papiamentu. E di “ke men bo ta fresku tambe!” Mi di: “Fresku manera piska òf e revista?” E di “tene bo kuidou, bo no sa ta ku ken bo ta piska.” Ma bira puntr’e si e tin karchi. Ela bisa mi ku e no sa bai fiesta. Ma bis’e mi ke bèl. E di: “ta ki ba kere ta fiesta?” Ma splik’e “no wòri bo, mi ta pasa mi karchi”… E la pasa mi un wanta! Mi’n por a wanta mas. Frustra ma sali drenta outo. Purba start, outo a dal mi palu! Logra start, bek dal den palu… Bo sa kiko? fòk papiamentu, otro bia mi ta keda mi kas tira un palu.
Keda na altura di nos postnan. Like of follow nos page riba Facebook! Konsenshi
Facebook: Paterson Acosta