“Kòrta orea” ta un di nos ekspreshonnan mas famá, e ta asina famá ku un tempu den área di Hospital/SVB tabatin un brùg yama asina.
Brùg Kòrta Orea den siglo 20.
Mi blòg di awe no ta pa wak o husga dikon hende ta kòrta orea paso kada ken ku nan motibu i preferensia. Pero, si mi ke para ketu na dikon ta parse manera hende hòmber ta hasi’e hopi mas ku hende muhé, paso e bèrdat ta ku tin statistiknan ku ta probá ku hende hòmber ku hende muhé no ta masha leu for di otro ora ta toka kòrtament’i orea.
Awo dikon ta parse manera hende hòmber ta kòrta orea asina mas tantu ku hende muhé?
Esei ta paso den nos komunidat machista, kòrtamentu di orea pa e ser maskulino ta muchu mas aseptabel kompará ku ser femenino. Pa mi duna un ehèmpel:
Un hende hòmber yen muhé ta un “machu” “player” o “mujeriego” ku ta denominashonnan ku no nesesariamente ta afekt’e negativamente, al kontrario tin biaha e por asta haña atmirashon di otro hende hòmber.
Di otro banda un hende muhé yen hòmber ta un “prostituta/p*ta”, “muhé pa loko”, kual si por keda komo un stèmpel pa hende husga i duna karanan di menospresio na e muhé.
Anto na mi opinion esaki ta pone ku hende hòmber ta muchu mas habri i “nonchalant” ku nan kòrtament’i orea kompará ku hende muhé ku mester ta muchu mas kouteloso. Asina’ki e impreshon ta keda ku hende hòmber sa ta muchu mas infiel ku hende muhé ta.
Pero esaki ta djis un di e tantísimo situashonnan den nos komunidat kaminda nos ta midi ku dos midi entre hòmber i muhé.
Mi ta bai duna un par di ehèmpel kon komunidat ta reakshoná diferente riba mes un situashonnan:
Un hòmber di 30+ aña, soltero, sin yu; “Hòm, bo tin dushi bida sua”
Un muhé di 30+ aña, soltera, sin yu; “ta ki dia bo ta bira serio? “Buska un frei, haña yu?” “bida di pa loko bo gusta”
Ora un hòmber kasá kòrta orea; Sin pensa dos bes ta puntra “Ta ku ken yu?”
Ora un muhé kasá kòrta orea: Ta duna un komentario direkt kontra e persona manera por ehempel “E muh’ei tin kurashi!”. Komo si fuera e hende muhé tin semper mas di pèrdè ku e hende hòmber tin.
Pero no ta asina si ku semper ta e hòmber ta esun privilegiá paso:
Ora un muhé no tin moda/sèn: nan ta bisa “Buska un hòmbu ku sèn yu”
Ora un hòmber no tin moda: nan ta bisa “Hòmbu bashí si no ta sirbi”
Ora un muhé bai sali ku su amiganan: nan ta bisa “Gezellugg!”
Ora un hòmber bai sali ku amigunan: nan ta bisa “ta muhé nan ti wak”
Ora un hòmber agredí un muhé: nan ta bisa “ABUSADOR”
Ora un muhé agredí un hòmber: nan ta bisa ku e hòmber ta “ECHT UN CHOCHO”
Anto asina tin yen ehèmpel mas pero pa ami ta importante si nos ke bai dilanti komo pueblo, pa nos kuminsá balansa kosnan entre hòmber i muhé. Si algu ta robes e ta mes un robes pa e hòmber ku pa e muhé. Si un kos ta bon e ta mes un bon pa tur dos. Kuminsá Mira, Sinti i Respetá otro mas komo igual.
Felis wikènt
Facebook: Jason Fullinck
Instagram: @konsenshi