Despues di a biba na Hulanda pa 12 aña mi a regresá Kòrsou na yüli di 2014. Huntu ku mi kasa y nos “mònster” chikitu, nos a wòrdu risibí ku un tremendo balasera na aeropuerto Hato. Sanguranan tambe tabata kontentu ku nos yegada, i nan a disidí di hasi nos un bishitá lagando un regalo atras: Zika. Dos dia plat riba kama ku doló di wesu tabata e sentensia. Pa nos yu sinembargo e sentensia tabata poko mas severo. E a terminá den e karniseria ku aki na Kòrsou nos ta yama SEHOS. Einan algun zùster(no tur) sin duda a sa di sobresalí riba e tereno di inkompetensia . Jufrou a “lubidá”di pasa kambia un lampi ku a pega nos yu su pia, ku segun protokòl mester kambia kada kuater ora. Un negligensia ku a resultá den un kemadura formal ku ta visibel te ku dia di awe! Danki SEHOS.
Danki Kòrsou! Mi Kòrsou, isla di bientu tur na infrou, isla kaminda portofon a wòrdu bende dor di mener na blou. Isla bunita pero mas ku 14 porshento ta sin trabou. Isla di turista, kolchon ku wasmashin benta kant’i kaminda. Isla kaminda polítiko ta traha “pastechi” miéntras tantu pueblo ta kome karni ku no ta na drechi. E djus mester ta bon sut, e batata ku hopi “Maggi” e kuminda hopi sous. Si awe MEO haña konènchi ku karpata, mañan nos ta para den rei pa dal e saté batata. Kòrsou mi Kòrsou, parti den Hende di pariba i hende di pabou.
E haitiano yama musue, e chines chino, e portuges joao. ”Juni ku Deka” ta brua anto e latina tur ora ta muha. 80 porshento desendiente afrikano pero nan ta tenta bu si bo ta muchu pretu! Papia malu dje “makamba” pero stima sinterklaas ketu.
Kòrsou mi Kòrsou e intenshon no ta pa kibra bu so ta djis mi sa ku bo por mihó! bo meresé tur nos sodó! Bunita manera bo so. Santu blanku awa blou, flamingo ros na Bándabou. Kòrsou mi ta bo yu! Ba dunami palu ku shimaruku i sòrsaka, Libertat pa kumpra mi masbangu kantu di kaya. Isla di panseiku ku kala. Den bo karnaval nos no ke stòp di kana. Bo tin pan sera ku pinda herebé pa ofresé, riba kaya nan ta puntrami: bo bo bo bo ke? Deportistanan establesé, intelektualnan den área múltiple. Kòrsou pordonami si ma hasi un poko fresku. Kòrsou ma regresá paso mi ke bu!
Facebook: Paterson Acosta