Weg’i Nòmber Kòrsou

Un biaha mas Kòrsou tabatin e gustu di tin su anual “Máratòn di Mayornan”, mihó konosí komo “inskripshon eskolar”. Ku tabata tin komo anfitrion e “usual suspects”: The Pariba Colleges. Kaminda mayornan ta kore di skol pa skol estilo “scavenger hunt” pa tira nòmber den un tómbola ku lo saka premio mayó den Mart.
Un kos ta sigur: Nos tur ke mihó pa nos yu(nan). P’sei mayornan ta pasa den e trastorno aki i muchu mas ora ta trata di bienestar i futuro di nan yu(nan).

Kiko ta e motivashon pa partisipá na e rifa anual aki?

Mihó Fasilidat – skolnan ku mihó infrastruktura, kaminda stulnan no ta kibra, dak no ta kai i murayanan ta di fèrf.

Material – Skolnan ku no tin skarsedat di material i e muchanan por studia sin interupshon.

Resultado – Skolnan ku ta konosí ku muchanan ta duna mihó resultado ku e promedio nashonal.

Puntonan bálido pa para den den un fila di 100 persona pa apliká aunke tin 10 puesto so disponibel. Un punto no propaganda ta “Networking”; na momento ku bo yu keda aseptá na e skol privilegiá huntu ku yunan di komersiante, polítiko, abogado etc., ta nifiká ku su sírkulo di amistat tambe lo ta un elite/privilegiá. Ta publíkamente konosí ku na Kòrsou no ta bai asina tantu pa “Ki bo sa?” pero ta bai pa “KEN bo konosé?”. Bo por tin kuantu estudio ku bo ke, pero sin “Padrino”, bo no por “risibí”. Ta nifiká ku stratégikamente e mayor ta posishonando su yu den un situashon favorabel si e logra inskribí su yu.

Unda esaki ta laga e otro muchanan ku pèrdè den e sorteo?

Nan tin ku dil ku e mesa kibra, falta di material i dak ta lèk. Si akaso tòg nan saka un resultado mihó ku ferwagt, mester kontrolá bon paso “probablemente ta froude“. Nan sírkulo di amistat ta konsistí di MacGyver nan ku ta maniobra ku loke nan tin, “soon-to-be dropouts” ku no por mas i ”chupadónan” ku ta mira chupamentu komo salida. No papia mes di e muchanan ku no a partisipá den e sorteo paso nan mayor no por a ni yega pariba. Esun ku su chèns pa bai AGO ta grandi, fuera di proporshon, kompará ku su chèns pa bai Havo. Anto pa loke ta nan nètwèrk wel…ta “no me ku no me!” ta e lema.

E punto ta ku miéntras no duna tur mucha, for di skol básiko bin ariba, oportunidat igual pa studia; E mayor (ku por) ta hañ’e ta kore tras di edukashon i un “bon” sírkulo awe, pa e yu no hañ’e ta kore den sírkulo sin edukashon mañan.

Pa abo ku a partisipá (kumpra) den e rifa e aña aki, Suerte!

Bo por siguimi riba ret sosial,
Facebook: Jason Fullinck

Instagram: @konsenshi

Leave a Comment

Or

Your email address will not be published. Required fields are marked *