Aki un luna mi ta kumpli 35, un edat ku mi no sa si ta yòn o bieu. E muchanan di 13 ta yama mi “Tio” i e penshonado ta reakshoná bisando “Ai no, ta mucha bo ta!” Reflekshonando riba e fase aki di mi bida mi a haña mi konfrontá ku e pregunta:
“Ki dia mi bira hòmber adulto?”
Ta keda bisa ku pa mucha muhé ora ku e haña su “regla”, e la bira “dams“.
Pero e mucha hòmber ki dia e ta stòp di ta mucha hòmber i bira “hòmber”?
Diferente nashonnan Afrikano, manera e guereronan di Maasai o e hendenan di Hamar na Etiopia tin ritualnan spesífikamente pa e mucha hòmber pasa aden i bira ofisialmente hòmber.(Mas informashon) Tambe tin religionnan ku tin ritualnan ku inisiá e mucha su hombresa; manera e hudiunan ku “bar mitzvah”
Den mi kaso, yu di Kòrsou/Afro-Kurasoleño, mi no tin sigur ki dia mi a pasa di ta mucha hòmber i asumí mi posishon komo hòmber den sosiedat.
Ki dia?
Dia mi a stima den bashí promé bes? o dia mi sa ki ta kon bai “aleman”? Dia mi a sunchi ku e mucha muhé ku mi no ta kòrda su nòmber o dia ma mòrs ku e mucha muhé ku opvio tabatin mas eksperensia seksual ku mi? Dia mi a bebe e meks di alkohòl na e restorant chines despues di skol? O dia mi a hasi 18? Dia mi a bira tata o dia mi a kasa?
Mas mi hasi mi mes e preguntanan mas mi realisá ku mi no tin respuesta. Eventualmente mi a yega mi edat aktual i awó mi tin duda ku si mi ta kompletamente madurá manera mester ta.
Ma kuminsá pensa ku si ta ku ami so kosnan a kana asina o si tin mas hòmber adulto den nos komunidat ku yega “hombresa” den “autopilot“. E pensamentu ei a trese mas pregunta:
- Si ta asina, ki konsekuensia e fenómeno aki tin pa nos sosiedat?
- Ta pa e motibu aki ta keda bisa ku mucha muhé ta madurá mas lihé ku mucha hòmber?
- Ta pa esei gran mayoria di mucha muhé na MIL tabata wak e gainan mas grandi?
- Ta pa esei e relashonnan di hòmber ku muhé tin biaha ta sinti manera ta muhé tin ku pone struktura pa e kos por kana?
- Ta pa esei sierto hende hòmber ta “struggle” ku responsabilidatnan di tata na edat mas yòn?
- Ta pa esei nos hende hòmber ta faya ku responsabilidatnan di pareha?
- Ta pa esei nos sa haña ku e muhé ta eksigí demasiado di nos?
Un pregunta “simpel” a hiba mi na shen otro pregunta,
Kos di pensa ariba o kos di ignorá?
Ki dia Abo a bira hòmber?!
Komentá abou!
Bo por sigui mi riba ret sosial,
Facebook: Jason Fullinck
Instagram: @konsenshi