Imagina bu sinta na “mambo beach” nèt durante e orario ku solo ta bahando, gosando di e paisahe bunita i disfrutando di un di e mihó kòktel nan ku bida tin pa ofresé. Di aleu bo ta mira un grupo di mucha chikitu ta kore hunga i nan ta spùit awa riba otro pa medio di un artefakto ku ta parse di ta un pistol di awa. Na momento ku e mucha nan ta mas serka bo ta realisá bo mes ku e artefakto no ta un skopèt si no un pénis gigante di plèstik ku ta spùit awa kada bia ku e mucha nan primi e saku di webu ku tin kologá na dje. E mucha nan tin, loke nos lo yama den boka di pueblo, un p@t*n di awa den nan man! Kiko bo reakshon lo ta i kiko lo bo pensa di e mayor ku deliberadamente ta kumpra un artefakto asina ki pa su yu hunga kun’e?
Un pénis ta algu ku ta fungi komo hèrmènt pa ekspresá amor, eksperensia plaser i ta asta forma parti den kreashon di bida humano kaminda un skopèt ta fungi pa atraká, mata i destruí bida. Awor ta kon por ta ku mayoria hende, inkluso mi mes, ta haña e idea di un skopèt di awa den man di un mucha ménos repugnante ku e otro artefakto ya ariba menshoná?
Porta nos ta un poko hipókrita! Nos ke tapa wowo dje mucha nan durante un esena di un simpel sunchi na televishon pero “kijk door de vingers” p’e esena di “akshon” den csi. Ta aseptabel pa partisipá den un kaminata pa rekoudá fondo pa mucha nan di ménos rekurso, ku un ti-shirt bisti ku a wòrdu fabriká dor di mucha nan di ménos rekurso na un otro pais. Loke si no ta aseptabel ta si un hende muhé den e kaminata disidí kita e ti-shirt ei dor ku e ta sufriendo kalor. Mundu ta kaba si nos mira pida tete den públiko! E mes un tete ku a yena nos tur su stoma na chikí anto e mes un tete ku ta keda komersialisá pa bende un kantidat di produkto mundialmente. Awor e tete ei a bira opseno i bulgar.
Ke men den sierto sentido nos no ta solamente hipókrita pero tambe mal agradesí! Kiko realmente nos ke promové? Kiko ta opseno i kiko di bèrdat ta bulgar? E teksto aki òf bo interpretashon?