Jufrou Shirley

Lesando e teksto “Weg’i nòmber Kòrsou” ku mi a kolega a skirbi algun siman pasa! mi no por a laga di bai bèk ku mi pensamentu na e tempu ku mi mes tabata den e sapatunan di muchanan aki. Tempu di mi tempu, bishitante di skol di fundeshi. Diferente memoria a pasa den mi kabes i naturalmente algun tabata mas kla ku otro.

Un persona ku en todo kaso nunka mas lo mi lubidá for di e periodo ei di mi infansia ta jufrou Shirley. Jufrou Shirley, un maestra ku tabata mira e kos nan un poko diferente for di otro dosente nan. Shirley no tabata komprendé ku un liñal ta kos pa midi i hala strepi kun’e, segun e un liñal ta fungi komo artefakto pa bati e muchanan “mala mucha” ku ne. Jufrou su man nan no tabata sirbi solamente pa tene kreit i skirbi na bòrchi pero tambe tene oreanan di mucha ku “no ta tende” i ranka nan. Den e aña eskolar bou di mando di jufrou Shirley aki mi a eksperensia mucha nan ku dede habri sanger paso nan a skirbi ku pen den un buki ku mester a skirbi ku pòtlot. Mucha muhénan di apénas 10 aña wòrdu yama “p*ta” den klas. Stot den garganta i wanta tabata “al órden del dia” i mi mes a yega di haña kònkel den kabes pa kuminsá traha prufwèrk muchu lihé(nerdmove).

Na e edat madurá ku mi a yega aki mi por purba aklará jufrou Shirley su komportashon komo unu di un persona ku seya ta sufri di bi-polarismo, tin problema nan matrimonial òf ta djis un mal hende! Loke si mi no por keda kla ku ne ta kon e otro supuesto “bon maestro” nan por a sinta mira so sin tuma akshon pa protegé e alumno nan. Nan no tabata lubidá di resa na Kristu Hesus djaluna mainta si!

Kisas nan tabata pensa: “lag’e kos den man di Dios” mientrastantu yu nan di mama ta tuma moketa na skol. Kisas tambe tur jufrou ku mener tabata risibí un “lisensia pa abusá” serka skolbestür anto ta sierto di nan so tabata skohe pa ehersé e derechi aki. Ami no sa! Loke si mi sa ta ku ta esaki ta loke Sr. Martin Luther King tabata ke men na momentu ku e la bisa: e silensio di e bon hende nan ta mas peligroso ku e brutalidat e mal hende nan!

 

Facebook: Paterson Acosta

Leave a Comment

Or

Your email address will not be published. Required fields are marked *