Preservá Nos Pasado, Sigurá Nos Futuro: Un Yamada Urgente! 

Riba tereno di historia, kultura, i “civil society” na Kòrsou, nos ta na rant di un krísis;

E generashon aktual di ekspertonan – historiadónan, preservadónan di kultura, i lidernan sosial – ta birando mas grandi na edat i tin un nesesidat enorme pa un generashon nobo ku ta kla pa tuma e batuta i sigui. E materianan aki ta kritiko pa nos pais i pueblo; nan ta forma e wes’i lomba di nos herensia nashonal i identidat, tambe ta kontribuí na nos komprendementu di pasado i vishon pa futuro. 

Komo un persona aktivamente envolví riba e terenonan aki, mi a mira personalmente e implikashonnan di e kambio demográfiko aki. Komo boluntario, mi a traha ku sierto di e ekspertonan aki for di 2012, ora ku mi tabata tin 29 ana di edat. Tempu ku mi tabata e uniko hóben den un grupo ku tabata tin un edat promedio di mas ku 60 aña. Bula bin bèk awe, kasi 12 aña despues i e situashon no a mehorá. E mesun ekspertonan awor ta un dékada mas bieu i no tin sufisiente hobennan kla pa kuminsá relevá nan. Asinaki, futuro no ta mustra prometedor. 

Ora ku e individuonan aki ta retirá òf no tei mas, tin un peliger ku nan konosimentu i ekspertisio por keda pèrdí. Sobadje ya kaba tin hopi trabou, investigashon i estudio ku mester hasí ainda (sin sufisiente hende pa hasi nan), riba dje tin e problema di sigurá ku e konosimentu kolektá durante añanan pa e ekspertonan aki no keda pèrdí. 

Si nos no atendé ku e problema aki, e konsekuensianan lo ta severo. Nos ta kore riesgo di pèrdè un gran parti di nos herensia kultural i konosimentu históriko. Ademas, sin un generashon nobo di ekspertonan pa kontinuá ku e trabou, debernan i responsabilidatnan importante lo no por keda kumpli. Mi ke tuma e oportunidat pa menshoná nòmber di algun di e profeshonal, eksperto, heroenan aki, (hopi di kual ta mi mentor): Jeanne Henriquez, Stanley Quirindongo, Max Elstak, Gibi Bacilio, Frank Quirindongo, Richinel Ansano, Rene Rosalia, Rose Mary Allen, Charles Do Rego, Lionel Janga i Humphrey “Pim” Senior. Nan tur ta “heavy weight” den e mundo di historia, kultura, i “civil society” i tur ta “still going strong”. Nos lo kier mira nan sigui pa semper, sin embargo, nos mester ta realista. Nan tambe meresé e posibilidat pa retirá i pasa mas tempu ku nan famia, sabiendo ku nan trabou i vishon lo kontinuá den man di hóbennan motivá, enérgiko ku ta kla pa sigui ku e lucha. 

Nos mester enkurashá generashonnan mas yòn pa envolvé nan mes riba e terenonan aki. Esaki por sosodé si:

1. Bekanan i Supsidionan: Boga pa e gobièrnu òf institutonan relevante duna beka i/òf supsidio spesífikamente pa estudio den historia, kultura i sosiedat sivil. Esaki lo hasi’é finansieramente fásil pa mas hóben sigui edukashon den e materianan aki.
2. Kreashon di Oportunidatnan di Trabou Atraktivo: Traha huntu ku gobièrnu i sektor privá pa krea oportunidatnan di trabou den e terenonan aki ku ta ofresé salarionan kompetitivo i benefisionan. Esaki lo hasi e terenonan aki mas atraktivo pa hóben i sigurá ku nan por mantene nan mes mientras nan ta preservá i promové nos herensia kultural i konosimentu históriko.
3. Feria di Karera i Kampañanan di Konsientisashon: Organisá feria di karera i kampañanan di konsientisashon den skol i universidatnan pa eksponé studiantenan na e oportunidatnan i importansia di e terenonan aki. Esaki por envolvé presentashonnan dor di ekspertonan aktual, tayer interaktivo, i informashon tokante kamindanan di karera potensial.
4. Establese un “Mentorship Program”: Krea un programa di lidernan strukturá kaminda e generashon aktual di ekspertonan por pasa nan konosimentu i abilidatnan na hóbennan ku ta interesá den e terenonan aki. Esaki por envolvé reunión regular, tayer, i seshonnan di treining praktiko.

Pa konkluí, ta krusial pa nos tuma akshon awor. P’sei esaki ta un yamada urgente pa gobièrnu i institutonan relevante pa rekonosé e gravedat di e situashon i tuma e pasonan nesesario pa sostené e siguiente generashon di ekspertonan.