Introdukshon
E emansipashon i progreso di hende muhé a kondusí na kambionan importante den ròl di género den relashonnan di amor i dinámika di famia den añanan resien. Mientras mas muhé logra nivelnan mas haltu di edukashon i éksito profeshonal, e ròl tradishonal di hòmber komo sostenedó finansiero i protektor den famia ta keda desafiá. E artíkulo aki lo diskutí e panorama ku ta kambiando den edukashon i empleo na Kòrsou, e kambio den ròl di género, e debilitashon di e komunidat, e efektonan negativo riba muchanan, i posibel solushonnan pa un resolushon duradero.
E Kambio di Panorama den Edukashon i Empleo.
Mientras hende muhé na Kòrsou sigui avansá den edukashon i empleo, e panorama di ambos sektor ta pasando kambionan signifikante. E kambionan aki ta kontribuí tambe na e ròl di género i dinámika di famia den e pais.
Segun datonan di Universidat di Kòrsou (Moises Da Costa Gomez), entre 2015 i 2022, graduadonan femenino a superá konstantemente graduadonan maskulino (3 pa 1) den varios kampo di estudio. E tendensia aki tambe ta evidente den kamponan tradishonalmente dominá pa hende hòmber manera ingenieria, kaminda e porsentahe di graduadonan maskulino a baha for di 70% na 2015 pa 60% na 2020 (Universidat di Kòrsou).
Den pasado, e forsa di trabou tabata dominá pa hende hòmber, ku hòmbernan okupando trabounan ku ta paga mas haltu i posishonnan di liderato. Sin embargo, segun e datonan for di CBS (2019), e diferensia den entrada ta birando menos konstantemente durante e último añanan. Entre 2014 i 2019, e porsentahe di hende muhé ku ta gana entre NAf. 1001 – 2000 a oumentá for di 30.9% pa 35.8%, mientras ku e porsentahe di hende hòmber den e rango di entrada aki a baha for di 22.9% pa 21.2%. Similarmente, e porsentahe di hende muhé ku ta gana mas ku NAf. 3001 a oumentá for di 31.5% na 2014 pa 33.5% na 2019, mientras ku e porsentahe di hende hòmber den e kategoria aki a baha for di 39.8% pa 31.7% (CBS, 2019).
E kambionan aki den distribushon di entrada ta reflehá e partisipashon kresiente di muhé den e merkado di trabou i nan independensia ekonómiko ku ta kresiendo. E tendensia aki ta sostené mas aleu dor di datonan for di e Senso di 2011, ku ta mustra ku hende muhé a hasi avanse importante den nivelnan di entrada pa diferente grupo di edat. Sin embargo, ta importante pa notá ku desigualdatnan di entrada ainda ta persistí, i esfuersonan adishonal ta nesesario pa sera e espasio di salario entre hòmber i muhé kompletamente (Centraal Bureau voor de Statistiek, 2011).
Edukashon ta klave den e kambiamentu di panorama riba tereno di empleo. Mientras mas hende muhé logra edukashon superior, nan ta mas prepará pa kompetí pa posishonnan ku ta paga mas haltu. Segun NCES(2021), hende muhé a pasa hende hòmber den nivelnan di logro edukativo. E tendensia aki tambe ta evidente na Kòrsou, kaminda hende muhé ta gradua den propòrshonnan hopi mas haltu ku hende hòmber na Universidat di Kòrsou (Moises Da Gomez). E statistiknan di Universidat di Kòrsou ta mustra ku tabata tin un oumento konstante den inskripshon i graduashon di muhé kompará ku nan koleganan maskulino, enfatisando mas leu e kambio den dinámika di edukashon.
Sin embargo, ta esensial pa atendé ku e kresementu di kantidat di mucha hòmber ku ta “dropout”, ku por ta konsekuensia di sistema di edukashon ku no ta adaptá na nan nesesidatnan spesífiko di studia. Segun trabou di Jawanza Kunjufu den su buki, “The Conspiracy to Destroy Black Boys,” e ta sostené ku e sistema di edukashon aktual no ta apropiá pa muchanan hòmber pretu, ku ta pusha nan afo i kontribuí na kantidatnan mas haltu di desershon skolar. Kunjufu ta argumentá ku tin strategianan di enseñansa mas efektivo pa muchanan hòmber pretu, ku mester ser inkorporá den e sistema di edukashon pa hasi nan mas envolví i duna sosten na nan éksito.
Dor di eksaminá e perspektivanan ofresé pa ekspertonan manera Kunjufu, edukadornan i polítikonan por identifiká i implementá strategianan adaptá pa atendé ku e nesesidatnan úniko di muchanan hòmber den e sistema di edukashon, spesialmente esun for di komunidat marginá. Asegurá ku tur e studiantenan, sin importá sekso òf situashon sosial, tin akseso na un edukashon ku ta adaptá na nan nesesidatnan spesífiko, esaki ta esensial pa promové un sosiedat i oportunidat di trabou mas balansá na Kòrsou.
E Kambio di Ròlnan di Género: Konflikto i Tenshonan.
E kambio den ròl di género a trese i lo sigui trese konflikto i tenshonnan potensial den relashonnan i famianan, ya ku tantu hòmber komo muhé ta lucha pa adaptá na e panorama ku ta kambia di ekspektativa i responsabilidatnan. E forsa di trabou i e statistik di entrada di Kòrsou ta revelá ku hende muhé a hasi avanse importante den término di entrada i empleo durante e añanan. E datonan for di e Senso 2011 ta mustra ku muhé tabata gana mas den e rangonan di entrada TE KU NAf. 2000, mientras ku hòmber tabata gana mas den e rangonan di entrada RIBA NAf. 2000,-. Sin embargo, e informashon resien di CBS for di 2014 pa 2019 ta mustra un disminushon den e espasio di entrada entre hòmber i muhé den diferente nivel di entrada.
E kambionan aki den e panorama ekonómiko por trese sentimentu di inseguridat i temor den hòmbernan ku ta kustumbrá na ta e sostenedó finansiero prinsipal den nan famia. Un estudio pa Galinsky (2016) a haña ku hòmber ku eksperensiá un disminushon den nan ròl tradishonal di proveé por sinti nan mes menasá, ku ta kondusí na reakshonnan negativo i problema sikológiko. E inseguridatnan aki por pone mas preshon riba relashonnan, ku ta kondusí na un oumento den konfliktonan di pareha i tasa di divorsio.
E datonan di matrimonio i divorsio di Kòrsou entre 2011 i 2019 ta sostené e argumento aki, mustrando un oumento den kantidat di divorsio. E propòrshon di divorsionan pa kada 100 matrimonio a oumento for di 46% na 2011 pa 73% na 2019, indikando un subida signifikante den disolushon di matrimonionan. E oumento aki den kantidat di divorsio por ta atribuí parsialmene na e tenshonnan ku ta surgi di kambionan den ròl di género i e impakto ku a sigui riba relashonnan.
Aparte di e kambio den dinámika di poder ekonómiko, e kultura di machismo i falta di desaroyo emoshonal serka hopi hende hòmber ta kontribuí na konfliktonan den relashon i famia. E kultura di machismo, ku ta enfatisá e ròl di sekso maskulino tradishonal i su ekspektativanan, ta topa ku independensia ekonómiko i empoderamentu di hende muhé ku ta kresiendo (Connell, 2014). E problema aki por manifestá su mes den diferente manera, inkluso un oumento di violensia doméstiko. Por ehèmpel, investigashon di Kaukinen (2019) a haña ku hende hòmber ku ta pegá na normanan maskulino tradishonal ta chèns mas grandi pa hasi su mes kulpabel di violensia doméstiko komo un medio di mantené kontrol i mantené poder den nan relashon.
Hopì hòmber a kresé siñando pa suprimí nan emoshonnan, loke por resultá den falta di desaroyo emoshonal i abilidatnan efektivo di komunikashon (Levant, 2013). E supreshon emoshonal aki por oumentá konfliktonan den relashon, ya ku e hende hòmber por tin problema pa identifiká i ekspresá nan sentimentunan, i tambe atendé ku problemanan di un manera konstruktivo. Den konteksto di Kòrsou, e faktornan aki – kambiamentu den ròl di género, kultura di machismo, i falta di desaroyo emoshonal – ta krea un ambiente kompliká ku por pone preshon riba relashonnan i dinámika di famia, manera ta reflehá den e sifranan kresiente di divorsio.
- Promové igualdat di sekso den edukashon; Mientras ku e oumento den inskripshon i grado di graduashon di hende muhé ta un desaroyo positivo, ta importante pa garantisá ku mucha hòmbernan no ta keda atras. Esfuersonan mester keda hasí pa disminuí e kantidat di mucha hòmbernan ku ta “dropout” i motivá nan pa gradua. Esaki por logra dor di intervenshonnan dirigí, programanan di mentor i enbolbi “role model” maskulino pa inspirá i sostené mucha hòmbernan den nan búskeda di edukashon.
- Enkurashá diálogo habrí i komprenshon: Ta esensial pa krea un ambiente den kua hòmber i muhé por partisipá den diskushonnan habrí i sinsero tokante e kambionan den ròlnan di genero i ekspektativanan. Enkurashando komprenshon i empatia entre seksonan por yuda tantu hòmber komo muhé pa adaptá na e kambionan di responsabilidatnan sin sukumbí na inseguridatnan òf konfliktonan.
- Redefiní maskulinidat: Ta krusial pa desafía i redefiní e ideanan tradishonal di maskulinidat pa adaptá na e era moderno. Dor di promové e idea ku e ròlnan nobo den e kas di famia ta maskulino tambe, hòmbernan por wòrdu enkurashá pa partisipá mas aktivamente den responsabilidatnan doméstiko sin sinti nan mes insegur òf demaskulinisá. E kambio aki den mentalidat por kontribuí na un dinámika di famia mas armonioso i promové igualdat di sekso.
- Atendé ku e kausanan prinsipal di inseguridat: Inseguridatnan ku ta surgi for di e kambionan den rol di sekso por kondusí na konflikto i tenshonnan den relashonnan i famianan. Brindando konseho i terapia por yuda individuonan atendé ku e inseguridatnan aki i stimulá relashonnan mas salú.
- Implementá medidanan ku ta promové igualdat di sekso: Gobièrnu mester desaroyá i apliká medidanan ku ta promové igualdat di genero den diferente aspekto di sosiedat; inkluso edukashon, empleo, i puestonan di desishon. Krea un ambiente den kua tantu hende hòmber komo hende muhé por logra i kontribuí na un komunidat mas balansá.
- Eduká hende hòmber i hende muhé riba komunikashon den relashon i kriamentu di yu: Bon komunikashon den relashon i konosementu pa edukashon di yu por yuda hòmber i muhé komprende mihó kon pa komuniká, atendé ku konfliktonan i sostené otro den e ròl di genero moderno. Ofresé klasnan i tayer pa parehanan i mayornan den skolnan i komunidatnan, esei lo por yuda ehekutá un kambio duradero den aktitut i komportamentu.
- Promové un kultura di respet mutuo; Enkurashá un kultura di respet mutuo den komunidat, esaki lo yuda homber i muhé komprende i apresiá e balor di otro i e importansia di koperashon pa logra un sosiedat mas armonioso. Programanan di informashon, tayer i kampaña di edukashon públiko por enfatisá e importansia di respet mutuo i koperashon entre hòmber i muhé.
Konklushon
Den totalidat, pa logra un solushon duradero pa e desafionan ku ta surgi for di e emansipashon di hende muhé i e kambionan den ròlnan di genero i dinámika di famia na Kòrsou, mester un enfoke integral ku ta inkluí promoshon di igualdat di sekso, desaroyo di bon komunikashon i komprenshon den relashonnan, redefinishon di maskulinidat, señalá i atendé ku inseguridatnan maskulino i implementashon di medidanan i programanan ku ta promové un kambio positivo den komunidat. Dor di traha huntu, por krea un sosiedat mas balansá i armonioso pa tur.