“Turbo Nitro en la Machina, Machika machika machika!” Manera ma konta kaba, na yuly 2014 mi a regresá Kòrsou despues di 12 aña biba afó. E siguiente mainta despues di mi yegada ma disidí di fia mi un di mi mayor nan su outo pa bai dal un keiru i tira un bista riba Kòrsou. Banda di paisahe nan i hende nan bunita ku mi a mira durante mi trep, ma tuma nota di 3 diferente kos ku a pone mi realisá ku definitivamente mi a yega kas bek.
Kantu di kaminda ma mira un kachó di blas/hincha benta abou pia na laira. Mi a sigui kore i mas pariba ma bin topa un yuana parti na dos. Ora ku mi tabata den e rekta final ma bin haña mei mei kaminda ku un pushi malamente machiká ku tabata birando parti di e asfalt. Mi no por gaña, komo un persona “acaba de llegar” ne momento ei, e no tabata un bista agradabel pero mi no tabata di shòk tampoko. Anto ta netamente e kos ei ta loke ku a laga mi kompletamente di shòk despues ku mi a pensa un ratu. Mi tabata tin mi mes pa un kabayero bastante sivilisá (mi sa dal mi ‘brunch’ nan ratu ratu) pero mi akshon nan e dia ei a mustra mi otro. Ma wòrdu presentá ku 3 chèns pa hasi un kambio pero ma skohe pa sigui kore bai i asta pasa wak un ko’i ches na kaminda pa bai kas. Bestia morto machiká kant’i kaminda a bira kos “normal” pa mi! Kon por ta?
Porta ta p’sei awendia tin hende riba e dushi isla aki ta warda nan kachó haña yu kaba hinka e yu nan den sak’i plèstik tira nan kant’i kaya. Mi shon, si bo no ke òf tin moda di hiba bo bestia di kas sterilisá, por fabor tin maske ta e desensia di laga bo restorant preferí usa e puppy nan pa traha saté ku batata pa bo kome! Bo tin mai haña asta deskuento!
Ni maske kuantu gana mi tin di kue e ruta fásil i mustra dede riba e hende nan ku spesífikamente ta komete e akto nan aki, mi no por hasi esei! Meskos ku mi tin ku sera mi boka ora mi lesa riba retnan sosial kiko hende nan, hopi biaha ekstranhero, ta pensa di nos (hende lokal) pa ku e tema aki! Paso pa kon ku bo mire, segun ami e problema aki no ta ni sikiera un punto di agenda!
#CuraFail!#SterilisaofSate!#PushiMachika!#Savage
Facebook: Paterson Acosta