Mi ta imaginá mi un komunidat perfekto, kaminda tur hende por sinta rondó di un kandela, man tene, kanta kantikanan manera “kumbaya”, “Ebony and Ivory” o “We are The world”. Pero lamentablemente na Kòrsou nos no tin e tipo di Komunidat aki paso aparentemente:
“Curacoënaars houden nog steeds niet van Nederlanders”
Kon por ta ku e yu’i Kòrsou tin un aktitut asina ki? Kon e yu di Kòrsou por ta asina Ingrato?
Despues ku e Hulandes a saka nos for di e mondinan di Afrika pa trese nos sivilisashon?Duna nos e oportunidat di por traha por nada den su serkania pa mas ku 200 aña? Despues ku fo’i su bon Kurason a regalá nos nos libertat na 1863? Despues ku fraternan Hulandes a bin disiplina (lesa “bati”) nos pa nos mes bon? Despues ku Shell a subi nos salario? despues di 30 di mei 1969? Despues ku na 2013 Mark Rutte a tuma espasio den un kumbre mundial pa menshoná ku nos ta un isla di “Happy Black Petes”? Despues di Geert Wilders of despues di Thierry Baudet?
Ke men ta ki tipo di sinbèrgwensa/ kara sin wesu nos ta pa nos ta asina ingrato?
Bèrdat ta ku mi no mester generalisá; paso ta asina ta ku na Kòrsou tin hopi “Siudadano ehemplar”. Siudadano ehemplar ku no ta pegá den pasado, anto no tin “minderwaardigheidcomplex” (pretu pero bunita). E “siudadano ehemplar” ta konvense ku pa nos bai “dilanti” mester laga pasado den pasado anto sali nos kas tur aña di nobo bai selebrá “Koningsdag” i “Sanikolas” ku pashon. E siudadano ku ni maske kuantu wanta verbal e risibí serka Hulandes ta keda “turn the other cheek”. Kada bes ku e yu’i Kòrsou ingrato vosifera su sentimentuan kontra e kolonisadó, e siudadano ehemplar lo sali na e “Shon” su defensa. E siudadano ta para kla ku su zuip den man pa bari e sintimentu nan aki for di mesa. Asina ki e por mustra e Hulandes ku e si no ta manera e sobra negertjes! E ta unu di e poko nan ku si ta elevá, i ta tuma komo su enkargo pa tene e ingrato nan kontrolá. Ku e meta semper ku un dia e hulandes lo rekonosé i rekompensa su komportashon ideal.
“effe serieus”:
Si di bèrdat “nos” ke yega na e senario kaminda ku e yu’i Kòrsou y e hulandes tin un stimashon inkondishonal pa otro. Porta Nos tin ku kuminsá eliminá diferensia nan entre nos, kaminda Hulandes ku Papiamentu tin mes un balor. Hulandes Europeo i Hulandes Karibense tin mes un derechinan i kolo di kueru no tin konsekuensia riba oportunidatnan den bida.
Ma lesa un kaminda ku e yu’i Kòrsou no ta komprendé e dicho “Wat gij niet wilt dat u geschiedt, doe dat ook een ander niet” pero mi ta kere ku e Hulandes no ta komprendé e dicho “Loke bo planta, bo ta kosecha”.
#PraatNederlandsMetMe