“Lindomar, bo kèts ta kore duru!” ta loke Jenifer, e mucha ku ami tabata gusta, a bisa Lindomar. Despues ku nos a kaba di pusta! Anto esei ta e momento eksakto ku mi a sera konosí ku e “Hater” den mi.
Ami, Lindomar i Jenifer tabata den derde klas. Lindomar tabata tin un Nike, ami un Kobra. Prome ku e dia ei, ami ku Lindomar semper tabata hunga ninichi den pause pero for di e dia ku Jenifer a duna e komentario, ma kuminsá haña ku Lindomar ta hunga sushi, e ta blo ta haña 6 pa prufwèrk anto e no a invitá mi dia ela hasi aña. Ke men ma stòp di hunga ku Lindomar den pause.
Fast Forward 25 aña despues, mi a topa hopi Lindomar ku Jenifer den mi bida anto tiki tiki pero sigur ma bin komprendé ku no ta e Lindomar ni Jenifer nan ta problema; ta e “Hater” den mi ta e kulpabel!
E kulpabel ku mi enfoke no ta riba loke mi tin pero riba loke mi no tin,
E kulpabel ku mi tin mas “smoesjes” ku mi tin resultado,
E kulpabel ku mi no por tuma kritiká i mi ta semper den defensa.
Pekuliar ta ku durante mi proseso di konosé e “hater” den mi, mi a ripara ku otro hendenan ta sumamente okupá ku rekonosé e “hater” nan eksterno.
For di tempu di Partypeeps, Hyves ku Msn pa Kitatin, Facebook ku Whatsapp; semper mi a tende dichonan manera:
“MAS BO PAPIA, MAS NAN KRESE”, “Don’t hate the player, hate the game”, “WE ZIJN NIET TE BREKEN”(N.T.B.) i ultimamente e famoso “ta zelos nan tin”.
Lamentablemente ami nunka mi no por a mira e “hater” nan ku nan tabata referí na dje pa mi por a papia ku nan. Pero p’sei awe mi ke manda un mensahe pa nos ban wak mas e “hater” interno. Paso segun mi nos tur tin un ‘hater” chikí (o grandi) paden. Anto si nos tur kuminsá venená e “hater” den nos mes, Kòrsou lo ta mihó. Kaminda nos lo apoyá otro na lugá di nos mes ta bringa nos mes.
Ke men siguiente bes ku bo mira:
E yave ku bo a bai skol kun’e ku su BMW 2018, no asumí ku ta droga e ta bende paso abo ta un Corolla 2007 bo tin. Porta e no a bai studia hinka su kurpa den un debe gigantesko di DUO pero a kuminsá traha na edat mas yòn.
Òf ora bo mira bo kolega femenino haña un promoshon, no asumí ku ta paso e ta drumi ke doño, paso por ta ku e ta traha overtaim sin keha, na lugá di tuma e break nan di 15 minüt èkstra ku abo ta tuma tur mèrdia.
Pero atrobe por ta ku ta ami te úniko hende ku tin un “hater” den mi.
Felis dianan liber!
Delete bo “Hater” anto Add mi:
Facebook: Jason Fullinck
Instagram: Konsenshi
Waw!! Esaki ta algu sigur pa nos tur pensa ariba. Manera tin skirbi, nos tur tin un hater den nos sea chiki of grandi. Mare nos tur por pone atenshon i ripara ku nos tin un den nos i trata na serio pa alimane. Mitin sigur ku Korsou lota e pais ku nos tur lo desea. I no esei so nos mes bida lota hopi mas dushi sin problema nn diario… danki pe bunita pensamentu trese !!!
Danki pa komentario, nos ta apresia!
Hopi bon punto Jason. Kos pa bai pensa!