Paraiso Digital

Ta 2018, Internet i retnan sosial pa mayoria ta; indispensabel.

Mas ku 100.000 habitante ta online, ku un hamber pa konektá, keda informá i haña balorashon.

Básikamente tin dos Kòrsou; un real i un digital.

Un Kòrsou real kaminda “státus” di hende ta keda midi pa propiedat, sèn i posishon. Esun digital na su turno ta midi státus a base di views, likes i suskripshon.

Un paraiso digital kaminda bo por tin un bida kompletamente diferente for di esun di realidat.  Kaminda bo por ta Boss, Diva o World Traveler na luga di e trabou frustrante di 8 pa 5 ku overtaim sin pago.

Un mundu virtual na unda bo tin un namorado sekreto ku ta duna bu tur kos, na lugá di e sugar dèdi, kasá i ku no por sali den públiko. Un paraiso digital kaminda bo por ta abogado defensor, ministerio públiko I hues.

Un utopia kaminda bo tin un matrimonio perfekto na lugá di un ku abuso i infidelidat. Un nirvana kaminda bo mes ta duna diagnóstiko médiko, análisis di wer i sirbi komo hurado di tumba.

Un paraiso kaminda bo tin un #healthylifestyle na lugá di e rutina di #truckdipan tur anochi.

Un universo paralelo kaminda bo por diskutí, koba mama i si akaso bo no a gusta e resultado di e diskushon; eliminá (blòk) e persona for di eksistensia. Un paraiso total pa esun ku ke skapa e bida real pa un ratu.

Pero…

E mes un paraiso aki ta kaminda mucha muhénan di 13 aña, tin 18. Pastor pedofíl ta kompartí salmo, mamanan kalakuna ta dediká i tatanan fantasma ta responsabel. Kaminda estafadornan ke yuda bu, polítikonan tin solushon I bolo di kasamentu ta fásil pa traha. Kaminda bende-patrianan ta revolushonario i tur hende por “durf te vragen”.

Aunke por ta plasentero kere e fantasia, nos tin ku keda ku pia riba tera. Paso meskos ku e por ta dushi e por ta desastroso tambe. Ke men seya bo ta den Kòrsou real o esun di fantasia, komportá i hasi bon ku hende. Paso bon ku bo hasi den e bida digital por bin bèk pa bo den esun real.

Bo por siguimi Paraiso Digital:

Facebook: Jason Fullinck

Instagram: @konsenshi