Black Panther
Black Panther; un historia fiktisio den e mundu di “Marvel Comics”, ku tin komo protagonista T’Challa komo rei di Wakanda, un pais skondí den ost Afrika ku no ta nada ménos ku un “Utopia” kaminda kolonialismo nunka no a mishi i siensia i kultura afrikano a desaroyá sin estorbo*. Wakanda tin e teknologianan di mas avansá i tin e material di mas balioso riba planeta (Vibranium)
Promé ku Black Panther
Komo mucha (añanan ’80, ’90) semper mi tabata gusta wak pelíkulanan di super héroe, mi faborito “Superman” (Christopher Reeves) mi a wak tur parti por lo ménos 3 bes. Anto manera mi, otro muchanan semper tabata mira ídolo den aktornan heroiko di Superman, Spiderman, Batman i asta klásikonan manera Rocky i Rambo.
E problema ku esaki ta ku niun di e ròlnan di héroe aki, personifiká dor di e aktornan aki, no ta representá ami komo un persona afro desendiente. Den otro palabra semper e héroe tabata e hende blanku. Komo mucha bo no ta konsiente di e daño ku e falta di representashon aki por bai hasi ku bo amor i konfiansa propio. I asina bo ta lanta ku un pensamentu kontaminá di ken por ta un super héroe i ken nò, ken ta mihó i ken nò. Aunke den e lastu dékada aki tabatin Hancock (Will Smith) ku ròl ku tin super poder PERO e tabata violento i un alkohóliko simultáneamente.
Representashon Afro na Kòrsou
Ora ta toka imágennan positivo, falta di representashon Afro na Kòrsou, tambe ta laga di deseá te awe.
Mi mester menshoná ku último tempu kompanianan manera Digicel i RBC a bin ta usa mas imágennan ku ta representativo di e poblashon. Esaki probablemente paso nan ta kadenanan ku ta operá den Karibe i otro pais/islanan si a pone un “standard” pa nan.
Pero en general te ainda tiendanan ta usa billboardnan ku modelonan blanku/latino, “promo girls” mes un kos. E problema mas grandi no ta ku nan ta sigi hasi esaki te dia di awe, e problema ta ku “nos” no ta hasi nada pa kambia esaki. Pero ora ku bo ta aseptá ku bo Dios mes no ta den bo semehansa, otro kosnan ta “ko’i kèns”.
Aparte di e sobredósis di amor ku nos a keda indoktriná kun’é pa e héroenan/diosnan europeo, nos ta sufri gravemente di Afrofobia!( Si bo ke sa mas di esaki wak mi dokumental “Rasismo“)
Nos no ke sa nada di Afrika paso:
“Nos no tin niun famia di Afrika”
“Nos ta desendiente di indjan”
“Afrikanonan ta den mondi nan ta kore”
etcetera, etcetera.
Pa esaki mi ke selebrá e pelíkula di Black Panther paso e ta algu pa nos muchanan, i e ta duna mi speransa ku e generashon nobo ta un paso mas dilanti ku esun di ami.
Puntonan importante di kon Black Panther ta importante pa ami:
- Representashon pa e muchanan, tantu mucha hòmber ku mucha muhe. No solamente T’Challa (Black Panther) ta un rei, un genio i un super sòldá pero tambe e damanan, Okoye ku Nakia ta muhénan poderoso, bunita, inteligente i fuerte.
- E ta mustra un balansa den hende hòmber ku hende muhé, ku ta parti di e kultura afrikano.
- E ta duna un bista ku Afrika por tabata un paraiso sin Kolonialismo.
- E ta mustra ku kultura afrikano por avansá huntu ku teknologia.
- E personahe N’Jadaka aka “Killmonger” ta trese hopi kuminda pa pensamentu pa Afro desendientenan di Diáspora.
- E ta kombatí Afrofobia, ta normal pa bisti paña Afrikano, ta normal pa hende muhé tin nan kabei natural, ta normal pa hende muhé ta den posishon di poder.
E tim di beisbòl Bándabou Tigers a bai wak Black Panther
Anto mi sa ku tin hopi di mi rumannan “konsiente” ku ta husga di unda e finansiamentu di e pelíkula ta bin, pero esei ta un otro diskushon ku lo mi atendé despues.
Saludo,
JF
#WAKANDAFOREVER
Bo por siguimi riba ret sosial,
Facebook: Jason Fullinck
Instagram: @konsenshi